Waziri Jafo akabidhi Magari kwa TARURA

Posted on: November 14th, 2019

Na Bebi Kapenya

WAZIRI JAFO AKABIDHI MAGARI KWA TARURA YENYE THAMANI YA SHILINGI BILIONI 2.2 

Waziri wa Nchi Ofisi ya Rais, Tawala za Mikoa na Serikali za Mitaa, Mhe. Selemani Jafo (MB), amekabidhi magari 22 yenye thamani ya Shilingi bilioni 2.2 kwa Wakala wa Barabara za Vijijini na Mijini (TARURA), yaliyonunuliwa na Serikali kupitia Mfuko wa Barabara (RFB), ikiwa ni sehemu ya juhudi za Serikali katika kukabiliana na changamoto ya vitendea kazi ambavyo imekuwa kikwazo kwa Wahandisi wa TARURA katika kufanya usimamizi na ufuatiliaji wa miradi ya barabara hasa maeneo ya vijijini.

Akizungumza katika hafla fupi ya kukabidhi magari hayo iliyofanyika katika viwanja vya jengo la PSSSF ilipo Makao Makuu ya TARURA jijini Dodoma Novemba 13, 2019, Mhe. Jafo alisema kuwa, magari hayo yataenda kuongeza ufanisi katika kusimamia na kufanya ufuatiliaji wa mara kwa mara kwenye maeneo ambayo miradi ya ujenzi wa barabara na madaraja inatekelezwa.

“Mwaka jana katika awamu ya kwanza nilikabidhi magari 26 na awamu hii ya pili ninakabidhi magari 22 jumla yatakuwa 48, imani yangu ni kwamba magari haya yatakwenda kusaidia kazi kubwa kufanyika kwa kutembelea maeneo yenye miradi ya wananchi na kutatua kero za wananchi”, amesema Mhe. Jafo.

Pia, Mhe. Waziri aliwataka madereva kuhakikisha kuwa wanayatunza magari hayo na kuhakikisha yanafanyiwa matengenezo ya mara kwa mara ili yaweze kudumu na kutumika kwa muda mrefu, na aliwaasa viongozi wa TARURA kutolazimisha kutumia magari yaliyopitisha muda wa matengenezo kwani inapelekea magari mengi kuharibika katika kipindi kifupi.

Aidha, Mhe. Jafo aliipongeza TARURA kwa kazi nzuri wanayoifanya ya ujenzi na matengenezo ya barabara na pia kwa ujenzi wa ofisi ya Makao Makuu ya Wakala katika mji wa Serikali Mtumba.

“Nawapongeza TARURA kwa kazi nzuri mnayoifanya, kila ninapopita Wabunge wanasifu kazi yenu nzuri, japo rasilimali fedha ni ndogo lakini mnafanya kazi vizuri, pia nawapongeza kwa ujenzi wa jengo lenu la Ofisi ya Makao Makuu katika Mji wa Serikali Mtumba na nawaomba mhakikishe kazi inafanyika usiku na mchana ili jengo lenu liweze kukamilika kwa haraka na tunatarajia Mhe. Rais atakapokuja Dodoma ikimpendeza aweze kulizindua”, amesema Mhe. Waziri.

Katika hatua nyingine, Mhe. Waziri aliipongeza Bodi ya Mfuko wa Barabara nchini kwa kazi nzuri wanayoifanya na kuwasisitiza kuendelea kuangalia upya mgawanyo wa asilimia 30 unaopata TARURA kwani Wakala unahudumia mtandao wa kilomita 135,000 na fedha inayotolewa haitoshelezi katika kuunganisha vizuri mtandao wa barabara kwenye maeneo ya uzalishaji na  kuwawezesha wananchi katika maeneo hayo kuboresha shughuli zao za kiuchumi na kijamii.

“Angalieni vizuri kwa jicho la ukaribu, Wakala ni mpya na unafanya kazi nzuri na sasa unahudumia mtandao wa barabara zaidi ya kilomita 135,000, haiwezekani bado tukaendelea na mgawanyo wa asilimia 70 kwa asilimia 30 wakati huko ndiko wananchi wanapoishi, mgawanyo huu urekebishwe angalau hata iwe asilimia 40 kwa 60 ili kuweza kusaidia kazi zifanyike vizuri”, amesema Mhe. Waziri.

Naye, Mtendaji Mkuu wa TARURA Mhandisi Victor Seff alieleza kuwa, bado kuna upungufu wa magari 337 kwa nchi nzima ili kuweza kufanya kazi kwa ufanisi, kwani kuna Halmashauri nyingine Wataalamu wa TARURA wanatembelea maeneo ya miradi ya ujenzi kwa miguu na wengine wanapanda mabasi ambapo inapelekea wakati mwingine kushindwa kufika maeneo ya ndani zaidi ili kuweza kutatua changamoto za wananchi na hata wakati mwingine kutowasimamia Wakandarasi kwa ukaribu zaidi. Hivyo basi, ununuzi wa magari hayo ni suluhisho litakaloweza kusaidia kusimamia miradi ya Wakala vizuri kwa kadri inavyotakiwa.

Serikali imekuwa ikitenga fedha kila mwaka kwa ajili ya ununuzi wa magari tangu TARURA ilipoanzishwa mwaka 2017 ambapo awamu ya kwanza yalinunuliwa magari 26 na sasa awamu ya pili yamenunuliwa magari 22 na kufikia magari 48 yenye thamani ya jumla ya Shilingi Bilioni 4.3. Katika awamu ya tatu, Serikali imeendelea kutenga fedha za ununuzi wa magari kwa mwaka wa fedha 2019/2020 ambapo magari 19 yameagizwa na TARURA kupitia ufadhili wa Bodi ya Mfuko wa Barabara.

MWISHO.